Gipahibalo og giklaro sa Department of Foreign Affairs nga dili na kinahanglan ang travel clearance alang sa mga opisyal ug empleyado sa gobyerno nga mobiyahe padulong sa Taiwan kung personal nga katuyoan ang maong tuyo sa biyahe.
Sumala sa DFA-Consular Office Zamboanga, ang travel clearance gikinahanglan lamang kung ang biyahe may kalabotan sa opisyal nga kalihokan sa gobyerno.
Sa sulat ni Consular Office Head Judith Nohay-De Fiesta ngadto kang Gov. Darel Dexter T. Uy, gipatin-aw nga ang kasamtangang guidelines sa pagkuha og clearance nag-apply lamang sa official travel, dili sa personal nga lakaw sa mga opisyal ug personahe sa gobyerno.
Base sa Memorandum Circular No. 82, series of 2025, gitugotan usab ang mga opisyal sa pagbiyahe ngadto sa Taiwan alang sa investment, trade ug economic-related activities sama sa pagtambong sa conferences, summits ug expos gamit ang ordinaryong pasaporte.
Kini nga klaripikasyon gipagawas human sa nadawat nga mga pangutana sa DFA gikan sa nagkalain-laing ahensya ug lokal nga panggamhanan bahin sa proseso sa travel clearance alang sa biyahe padulong sa Taiwan.(IKEN B. GULLEM)
Source: Zamboanga del Norte Provincial News Network