Usa ka insedente sa pagpamanhig gamit ang dili lisensyado nga armas ang miresulta sa pagkasikop sa usa ka indibidwal nga girespondihan sa kapulisan mga alas 7:00 ang takna sa gababhion niadtong Oktubre 26, 2025, didto sa Barangay Marapong, Sergio Osmeña, Zamboanga del Norte.
Ang report nadawat sa Sergio Osmeña Municipal Police Station mga alas 7:30 sa gabii gikan sa usa ka concern citizen hinungdan nga daling miresponde ang mga police personnel uban ang koordinasyon sa 1st Zamboanga del Norte Provincial Mobile Force Company aron masuta ang katinuod sa taho.
Sa inisyal nga imbestigasyon nasayran nga ang biktima, 46-anyos nga babaye nga vendor ug residente sa Barangay San Jose, nakaangkon og samad pinusilan sa iyang wala nga paa samtang naglakaw uban sa iyang bana miagi sa usa ka videoke bar human sa adlaw nga namaligya atol sa pista sa barangay.
Gikatahong nakadungog sila og usa ka buto sa armas sa wa matinong kalibre nga gituohang gikan sa nahisgutang establisemento nga niresulta sa pagkaigo sa biktima sa saag nga bala.
Dugang nasayran sa imbestigasyon nga usa ka 53-anyos nga lalaki nga residente sa Barangay Marapong ang gitumbok sa usa ka testigo nga maoy giingong ni-discharge sa armas.
Ang maong indibidwal boluntaryong mitahan ngadto sa mga barangay officials ug gi-turnover ngadto sa mga personahe sa Sergio Osmeña MPS alang sa tukmang disposasyon.
Ang biktima daling gidala sa mga nirespondeng police personnel sa Zamboanga del Norte Medical Center, sa Dipolog, alang sa pagpatambal, samtang ang suspek nagpabilin sa kustodiya sa kapolisan samtang nagpaabot sa dugang imbestigasyon ug pagpasaka sa tukmang kaso.(MEDALYN U. BORJA)
Source: ZNPPO