Sikop sa kapulisan ang usa ka High Value Individual atol sa gihimo nga buy-bust operation pasado alas 9:55 sa gabii niadtong Oktubre 26, 2025, didto sa Purok 7, Barangay Poblacion East, Salug, Zamboanga del Norte.
Ang maong dinakpan naila nga usa ka 55-anyos nga lalaki nga residente sa samang lungsod, giklasipikar nga High-Value Individual (HVI) kinsa gisikop pinaagi sa mga personahe sa Salug Municipal Police Station ubos sa direktang pagdumala sa Acting Chief of Police, uban sa koordinasyon sa Philippine Drug Enforcement Agency (PDEA).
Nasakmit atol sa operasyon ang usa (1) ka gamay nga heat-sealed transparent plastic sachet nga adunay sulod nga gidudahang shabu isip buy-bust item, duha (2) ka dugang nga plastic sachet nga adunay sulod nga gituohang shabu sa suspek isip possession, usa (1) ka P500 bill nga gigamit isip marked money, ug usa (1) ka pula nga Marlboro nga basiyo sa sigarilyo nga gigamit isip sudlanan. Gibana-banang usa (1) ka gramo ang gibug-aton sa mga nasakmit nga ilegal nga drugas nga adunay gibana-bana nga street value nga P6,800.00.
Ang suspek gipahibalo sa hinungdan sa iyang pagdakop ug gipahibalo sa iyang mga katungod sa konstitusyon ug ang mga nakumpiska nga mga butang gisumite sa Zamboanga del Norte Provincial Forensic Unit alang sa laboratory examination.
Samtang ang suspek ipaubos sa drug test ug ipaubos sa inquest proceedings tungod sa paglapas sa Sections 5 ug 11, Article II sa Republic Act No. 9165, o naila sa Comprehensive Dangerous Drugs Act of 2002.(MEDALYN U. BORJA)
Source: ZNPPO