Nasunog ang pikas parte sa usa ka panimalay nga gipanag iyahan ni Randolph Balisado Dalman hingkod ang pangidaron,ang insidente gikataho nahitabo atol sa ilang pagpanihapon uban ang iyang pamilya, didto sa Road 23, Jose Carreon Street, Barangay Dawo, Dapitan city.
Saysay sa nahisgutang nanimuyo sa maong panimalay nga matud pa atol sila nanihapon silang magpamilya sa may alas 6:45 kapin kon kulang Oktobre 05,2024,ug sa wala magdugay ilang nabantayan ang sa likod nga bahin sa mao nilang pinuy-anan, nga adunay misilaob nga dakung kalayo hinungdan nga dali dayon silang nanawag sa mga kasilinganan ug mitawag sa buhatan sa BFP Dapitan sa may 7:00 sa kagabhion.
Sa maong higayon dali usab dayun miresponde ang BFP DAPITAN CITY sakay ang mga personahe gipanguluhan ni F03 Godfray Mamba,ug dali dayun kining gisumpo ang pagdinalaob sa kalayo diin ang sunog ang anaa pa lamang sa first alarm.
Kahibaloan nga ang bodega sa pamilyang Dalman lang ang nasunog,ug mga personal lamang nilang mga kagamitan sama sa sapatos mga sanina ug uban pa. Ug matud pa walay gikatahong dakung damyos nga nasunog sa hitabo.Mapasalamaton ra usab ang tagtungod sa maong panimalay nga wala ra gayud naangol sa miyembro sa iyang pamilya.
Sa pagkakaron ang buhatan sa BFP Dapitan City padayun pang gahimo ug imbistigasyon aron mahibaw-an ang hinungdan sa sunog ingon man ang damyos niini. (Angelica T. Obina)
(Source: Dapitan City Police Station)