Malamposong naluwas pinaagi sa gikasang “Search and Rescue Operation” sa Dipolog City Risk Reduction and Management Office (CDRRMO) ilawom sa pagdumala ni CDRRM Officer, Atty. Arvin L. Bonbon ug Philippine Coast Guard (PCG) ning siyudad ang upat ka indibidwal nga nagsakay sa usa ka bangkang panagatan, nga na-aberya sa kadagatan, kaniadtong nakalabay nga Enero 31, ning tuiga.
Sa taho nga nadawat, sa may kapin kon kulang alas 12 dose sa kaudtohon sa Enero 31, 2023, usa ka tawag gikan sa Jupiter Base ngadto sa Dipolog City Operation Center nga nagpahibalo nga ang bangkang panagatan nga “FB Sharni Lance nga nakarehistro ubos sa pangalan ni Dominador Biolango, bolok puti nga mopaingon nganhi sa dakbayan ang nakasinati og pag-aberya, diin nagkinahanglan kini sa “rescue” sigun sa gitaho sa usa ka Mirasol Biolango, nga kasamtangang nagpuyo sa Egot, Estaka, ning siyudad, ug adunay permanenteng address nga Aliguay, Dapitan City.
Tungod niini, sa walay langan, ang team sa CDRRMO, ilawom sa team leaders niini nga sila si Marlaw Bilog ug Genalyn Sumagang ug Coast Guard, pinaagi sa Boat Captain niini nga si CG SN1 Gusty Keith Acopiado, sakay sa “Stingray 1” mihimo dayon sa search and rescue operation. Sa dapit mga alas 4:00 ang takna sa hapon
Ang nasangpit nga team malamposong nakaluwas sa na-aberyang bangka, diin giguyod kini padulong sa babayon uban sa upat (4) ka pasahero niini.
Ang upat ka mga pasahero ang giila nga sila si Dominador Biolango, 64 anyos, maoy operator sa Bangka, Shaina Sardani, 16 anyos, Mac Zion Biolango, 4 anyos ug Gloria Biolango, 63 anyos.
(Source: Dipolog City Government Facebook page)