Gipangunahan ni Governor Darel Dexter T. Uy ang turnover sa kapin ₱9 milyon nga mga proyekto sa imprastraktura ug upat ka rescue vehicles atol sa pagsaulog sa ika-46th Araw ng Salvador niadtong Septyembre 15, 2026.
Lakip sa mga proyekto nga opisyal nga giturn-over ang Improvement of Gutalac Lawn Tennis Court nga nagkantidad og ₱1.4 milyon, Road Rehabilitation sa Sitio Midsayao, Barangay Cocob nga nagkantidad og ₱1 milyon, ug Road Improvement of Barangay Site sa Barangay Cocob nga adunay laing ₱1 milyon nga pondo.
Gidawat usab sa upat ka barangay ang ilang tagsa-tagsa ka rescue vehicle nga nagkantidad og ₱1.4 milyon matag usa. Ang mga sakyanan gidawat nila ni Hon. Benjie Paglinawan sa Barangay Immaculate Concepcion, Hon. Jomar Ronquillo sa Barangay Sas, Hon. Ernestino T. Apostol sa Barangay Salvador, ug Hon. Dante Suma sa Barangay Sto. Niño.
Gilauman nga makatabang ang mga rescue vehicles sa pagpalig-on sa kapasidad sa mga barangay sa pagresponde sa mga emerhensiya ug kalamidad, ilabina sa panahon sa pagbaha ug uban pang insidente.
Atol sa programa, gipahayag ni Gutalac Mayor Eddie Justin Quimbo ang iyang pagpasalamat sa pagbisita ni Governor Uy ug sa suporta sa administrasyong probinsyal ngadto sa lungsod ug sa mga barangay niini.
Gipasiugda usab ni Quimbo ang iyang prinsipyo sa pagpangalagad nga “Gugma, Respito ug Serbisyo,” nga nagpunting sa pag-atiman sa katawhan, pagpaminaw sa ilang panginahanglan, ug paghatag og konkretong aksyon ug serbisyo.
Samtang, gi-awhag ni Governor Uy ang mga lider ug residente sa Gutalac nga ipadayon ang pagtinabangay aron mapadali ang kalamboan sa lungsod.
Gipahayag sa gobernador nga prayoridad sa probinsyal nga panggamhanan ang pagpalig-on sa agrikultura pinaagi sa paghatag og farm machinery, farm equipment, farm-to-market roads ug uban pang suporta alang sa mga mag-uuma ug mangingisda.
Gihisgutan usab niya ang pagpaayo sa mga serbisyo sa panglawas ug edukasyon, lakip ang pagpalambo sa mga pasilidad sa ospital ug pagtukod og dugang mga classroom.
Nagpasalamat usab si Barangay Salvador Chairperson Ernestino T. Apostol sa suporta sa gobernador ug lokal nga panggamhanan.
Ang turnover sa mga proyekto ug rescue vehicles nahimong usa sa mga nag-unang kalihokan sa ika-46th Araw ng Salvador, nga naghatag og dugang nga imprastraktura ug kagamitan alang sa mga komunidad sa Gutalac.(IKEN B. GULLEM)
Source: Zamboanga del Norte Provincial News Network