Arestado sa gipahigayon nga law enforcement operation ang usa ka nailhan nga Top 5 Most Wanted Person,mga alas 6:05 ang takna sa kagabhion Enero 28,2025, didto sa Barangay Poblacion North, Polanco Zamboanga del Norte.
Naila ang dinakpan nga si alyas “Jason”,59 anyos, Lalaki, residente sa Sitio Canibungan, Barangay Villahermosa, Polanco, Zamboanga del Norte, kinsa gidakop sa pagpangulo ni PMSg Jessie Mar Villapaz, uban sa koordinasyon sa Polanco Municipal Police Station (MPS) Tracker Team, tungod sa kasong Sexual Assault ubos sa Article 266-A(2) in relation to Section 5( B) sa RA 7610 ug Qualified Rape of a Menor.
Ang pagkasikop gihimo pinaagi sa duha ka warrant nga giisyu ni Hon. Nestor Rabulan Angeles, Presiding Judge sa Family Court, Ninth Judicial Region, Branch 3, Dipolog City, Zamboanga del Norte, pinetsahan og Enero 28, 2025.
Ang unang warrant may kalabotan sa Criminal Case Number 27778, nga adunay girekomendar nga piyansa nga Php 200,000, para sa Sexual Assault, samtang ang ikaduha kay Criminal Case Number 27777, para sa Kwalipikado Paglugos sa usa ka Menor de edad, nga walay piyansa nga girekomendar.
Ang akusado gipahibalo sa iyang mga katungod sa konstitusyon ug anaa na karon sa kustodiya sa Polanco MPS alang sa tukmang dokumentasyon ug disposisyon.(MEDALYN U. BORJA)
Source: ZNPPO