Tingkagol karon sa prisohan ang usa ka construction worker homan masikop sa gikasa nga malampusong operasyon sa mga tinugyanan sa balaod, niadtong Agusto 11,2025, sa may alas 4:20 ang takna sa hapon didto sa Barangay Goleo, Sindangan, Zamboanga del Norte.
Naila ang dinakpan nga si alyas “Pando” 45 anyos, lalaki, minyo,usa ka construction worker ug residente sa Barangay Calubian, Sindangan kinsa nalista isip Top 1 Most Wanted Person sa lebel sa munisipyo sa E-Warrant system sa Siayan MPS.
Gidakop kini pinasikad sa Warrant of Arrest alang sa krimen nga Paglugos, nga gi-docket ubos sa Criminal Case Number S-3113, nga giisyu ni Presiding Judge Mundlyn Geonzon Misal-Martin sa Family Court, 9th Judicial Region, Branch 05, Sindangan, Zamboanga del Norte, pinetsahan og Hulyo 23, 2025, nga walay piyansa nga girekomendar.
Ang suspek gipahibalo sa iyang mga katungod sa konstitusyon, lakip ang Miranda Warning ug Anti-Torture Law, sa usa ka dialekto nga iyang nasabtan.
Samtang ang dinakpan homan sa pagkasikop, gi-refer siya sa Sindangan District Hospital alang sa physical ug medical examination ug dayong gidala sa Sindangan Municipal Police Station alang sa tukmang disposasyon.(Medalyn U. Borja)
Source: ZNPPO