Ang hingtungdan sa City Disaster Risk Reduction and Management Council (CDRRMC), Local School Board (LSB) ug Local Health Board (LHB) nitambong sa usa ka meeting niadtong Abril 4, 2024, didto sa City Government sa Dapitan.
Ang maong meeting gipangulohan ni Dapitan City Mayor Seth Frederick P. Jalosjos,diin kini nagtipik kalabot sa grabeng kainit nga nasinati sa dakbayan.
Tungod sa epekto sa El Niño, niluwat ug suspension sa trabaho ug klase ang Local School Board ug nirekomendar og tunga sa adlaw nga klase nga ibalhin ngadto sa blended learning diin kini epektibo karong adlawa,Lunes,Abril 8, 2024,
Ang panagtigom gisalmotan nila ni G. Alemarlou B. Dagpin, General Manager sa Dapitan City Water District, kinsa nipahibawo sa pagkahurot sa suplay sa tubig ug niawhag sa mga dapitanon nga padayon nga magkonserbar sa tubig tungod kay limitado na ang suplay sa 3 ka tinubdan sa tubig.
Dugang pa,kung magpadayon ang kahimtang sa kainit sa panahon, mahimo silang mopili sa rotational valving schedule basis o water rationing.
Matod ni Dr. Mark Llagas sa Dr. Jose Rizal Memorial Hospital, sa Local Health Board, nga maayo matod pa nga walay kaso sa heat stroke sa dakbayan.
Apan gipahimangnuan ang publiko nga mag-amping pag-ayo tungod kay ang grabeng kainit sa panahon maoy hinungdan sa hypertension, diabetes ug uban pang matang sa sakit. (Medalyn U. Borja)
(Source: City Government of Dapitan)