Miigo ang sunog sa Vista Area, Poblacion, Sibuco, Zamboanga del Norte niadtong Abril 26 sa gabii nga miresulta sa pagkalamoy sa daghang balay ug gibanabanang ₱15 milyon nga kadaut.
Sumala sa MDRRMO, misugod ang sunog alas 9:05 sa gabii ug gilayon kining gitubag sa lokal nga responders, uban sa tabang sa mga bumbero gikan sa Zamboanga City ug Quniput aron mapugngan ang pagkaylap sa kalayo.
Gikontrol ang sunog alas 10:41 sa gabii ug gideklarang napalong alas 11:14, diin labing menos lima ka balay ang naapektuhan, lakip ang duha ka panimalay nga adunay panaderya ug duha usab ka balay nga adunay sari-sari store nga hingpit nga nasunog.
Padayon pang giimbestigahan ang hinungdan sa sunog, samtang gitutokan usab sa mga otoridad ang pagtabang sa mga pamilyang naapektuhan ug ang kakulang sa fire truck sa lungsod nga bag-ohay pa nagtukod og fire station niadtong 2024.(JENIFFER JR. DELICA)
Source: Zamboanga del Norte Provincial News Network