Nagpadayon ang pagpadasig sa malungtarong agrikultura sa lalawigan human ang Department of Agrarian Reform (DAR) Zamboanga del Norte miturnover og solar-powered water pump ug nag-apod-apod og abono ngadto sa SILALELA Irrigator’s Association, Inc. sa Barangay Silawe, Polanco.
Gipangulohan ang kalihokan ni PARPO II Daisy Dell Suan Digamon, uban ni PARPO I Engr. Alfonso E. Tan, MARPO Antonio O. Tagulog, ug ARPO II Maria Luisa A. Alingal, nga personal nga mitabang sa pag-turnover sa mga farm inputs ngadto sa mga benepisyaryo.
Matud pa sa DAR, ang solar-powered irrigation system dako nga tabang sa mga mag-uuma kay naghatag kini og lig-on ug mas tipid nga suplay sa tubig nga dili na magsalig sa diesel, hinungdan sa pagkunhod sa gasto ug pagtaas sa ani. Kauban usab niini ang paghatag og organic fertilizers aron mapalambo ang kalidad sa tanom ug mapalig-on ang food security sa komunidad.
Gipasiugda sa DAR nga ang maong inisyatiba kabahin sa padayon nga programa sa ahensya sa pagpalambo sa produktibidad ug pagtabang sa mga agrarian reform beneficiaries nga mahimong mas lig-on, independente, ug produktibo nga sektor sa agrikultura.(IKEN B. GULLEM)
Source: DAR Zamboanga del Norte Province