Gilauman nga mas mapaayo ang transportasyon sa mga produkto, panginabuhian ug access sa healthcare ug uban pang serbisyo sa Sibuco, Zamboanga del Norte pinaagi sa ₱139.4-milyon nga agricultural infrastructure ug enterprise projects sulod sa ancestral domain sa Lintangan.
Pormal nang gipirmahan niadtong milabay nga adlaw, ang Implementation Management Agreement (IMA) alang sa duha ka dagkong subprojects nga mokabat sa ₱139.439 milyon.
Lakip niini ang ₱131.413-milyon nga farm-to-market road nga adunay gitas-on nga 7.90 kilometros, gikan sa Sitio Kolibatu (Logdeck) padulong sa Sitio Binawing sa Lintangan.
Direktang makabenepisyo sa maong proyekto ang 2,724 ka residente, lakip ang 1,562 ka Indigenous Peoples (IPs), samtang gibanabana nga mokabat sa 4,545 ang indirect beneficiaries.
Kabahin usab sa proyekto ang ₱8.026-milyon nga Copra Consolidation and Marketing Enterprise nga pagdumala sa Subanon Indigenous People Ancestral Domain Agriculture Cooperative (SIPADAC).
Gitumong sa enterprise project nga mapalambo ang produksyon, consolidation ug marketing sa copra aron madugangan ang kita ug mapalapad ang access sa merkado sa mga coconut farmers.
Ang SIPADAC adunay 50 ka farmer-members nga nagdumala sa kapin 263.25 ektarya nga fully bearing coconut plantations. Pinaagi sa consolidated marketing, gilauman nga molig-on ang ilang bargaining power ug mas mapaayo ang pagbaligya sa ilang mga produkto.
Matud ni Zamboanga del Norte Governor Darel Dexter T. Uy, dili lamang agricultural trade ang mapalambo sa mas maayong road connectivity, kondili mahatagan usab og mas sayon nga access sa healthcare ug uban pang importanteng serbisyo ang mga residente.
Gipasiugda usab ni Uy nga padayon ang provincial government sa pagpangita ug pagpatuman sa dugang nga farm-to-market roads, irrigation projects ug livelihood programs, ilabina sa mga lugar nga adunay dakong panginahanglan sama sa Sibuco, Baliguian, Sirawai, Siocon ug Siayan.(IKEN B. GULLEM)
Source: Zamboanga del Norte Provincial News Network