Gi-inagurahan ang Dipolog City Science Centrum sa Barangay Miputak, Dipolog City niadtong Agosto 12, nga nagtinguha nga mapaduol sa mga kabatan-onan ang pagkat-on ug pagdiskobre sa siyensya.
Mitambong sa ceremonial turnover ug inauguration sila Department of Science and Technology o DOST IX Regional Director Rosemarie S. Salazar, Provincial Director Nuhman M. Aljani, Department of Education Dipolog City Schools Division Superintendent Dr. Ma. Lisa R. Tabilon, ug Education Program Supervisor in Science ug Science Centrum Focal Person Jose Rey A. Adriatico, uban sa ubang opisyal ug stakeholders.
Gipasabot ni DOST Secretary Renato U. Solidum Jr. nga ang science education dili lamang kutob sa pagsaulo sa impormasyon, kondili naglakip usab sa pagpangutana, pag-analisa, paghanduraw sa mga posibilidad ug pagpangita og solusyon sa mga problema. Iyang gihulagway ang Science Centrum isip luna alang sa curiosity, creativity ug discovery.
Gipakita sa paginagurasyon ang panaghiusa sa DOST, Department of Education, Provincial Government ug LGU Dipolog sa paghatag sa mga estudyante og dugang nga oportunidad aron mapalambo ang ilang kahibalo ug kahanas sa siyensya.(JENIFFER. JR. DELICA)
Source: Zamboanga del Norte Provincial News Network