Giaprobahan na sa ikatulo ug katapusang pagbasa sa Sangguniang Panlungsod sa Dipolog City ang Ordinance No. 26-372 nga naglatid sa klarong patakaran sa pagtukod, pag-operate, ug pagmintinar sa mga cockpit sa siyudad. Ang ordinansa giaprobahan atol sa regular nga sesyon niadtong Enero 27, 2026 ug misugod og bisa human kini pirmado ni City Mayor Roberto Y. Uy niadtong Pebrero 6, 2026.
Gipasidunggan sa konseho nga ang sabong dugay nang kabahin sa kultura sa mga Pilipino, apan gikinahanglan kini og hapsay ug responsableng pagdumala. Tumong sa ordinansa nga masiguro nga ang tanang cockpit adunay tukmang permit, nagsunod sa balaod, ug ginadumala ubos sa klarong mga lagda aron malikayan ang ilegal ug dili angay nga mga kalihokan.
Lakip sa mga ginadili mao ang pagsulod sa mga menor de edad, online cockfighting o e-sabong, machine betting, ug pagdala og armas sulod sa cockpit area. Giila sa lokal nga kagamhanan nga pinaagi sa maong ordinansa, mapreserbar ang tradisyon sa sabong samtang mapanalipdan ang kaayohan, kaluwasan, ug interes sa komunidad.(JENIFFER JR. DELICA)
Source: Dipolog City Government