Nagpahigayon og information and education lecture ang personnel sa Salug Municipal Police Station ngadto sa mga high school students sa Binoni National High School sa Barangay Binoni, Salug, Zamboanga del Norte, isip kabahin sa kampanya batok online sexual abuse sa kabataan.
Gipangunahan ni Police Master Sergeant Jarel A. Daquipil, Women and Children Protection Desk police non-commissioned officer, ang diskusyon kabahin sa Republic Act Number 11930 o ang Anti-Online Sexual Abuse or Exploitation of Children ug Anti-Child Sexual Abuse or Exploitation Materials. Gipasabot niini ang nagkalain-laing porma sa pag-abuso, mga silot sa balaod, ug ang mahinungdanong papel sa kabatan-onan sa pagpanalipod sa ilang kaugalingon.
Gihatagan og gibug-aton sa kapulisan ang kahinungdanon sa pagreport sa tanang insidente ngadto sa hustong ahensya. Ang kalihokan nagpakita sa padayon nga paningkamot sa Philippine National Police sa pagpalig-on sa kaluwasan sa komunidad, gender sensitivity, ug pagpanalipod sa mga bata ug uban pang bulnerableng sektor.(JENIFFER JR. DELICA)
Source: SALUG Municipal Police Station, ZNPPO