Duyog sa pagselebrar sa Fire Prevention Month, ang Salug District Jail ubos sa pagpangulo ni Jail Warden Samuel A Nasiad, aktibong miapil sa sunod-sunod nga kalihokan nga gipahigayon sa fire station sa Salug, Zamboanga del Norte.
Mokabat sa 15 ka persoahe gikan sa maong pasilidad ang mitambong aron ipakita ang ilang suporta sa kampanya alang sa kaluwasan batok sa sunog.
Gisugdan ang maong kalihokan pinaagi sa usa ka motorcade nga naglibot sa lungsod aron mapalapad ang kahibalo sa komunidad bahin sa paglikay sa sunog. Gisundan kini og usa ka Zumba session nga naghatag og kusog ug kadasig sa mga partisipante, samtang nagpalig-on sa panaghiusa tali sa lain-laing ahensya.
Pinaagi niini gipadayag sa Salug District Jail ang padayon nilang dedikasyon sa pagmintinar sa kahapsay, kaluwasan, ug kahandaan sa ilang mga personnel ug Persons Deprived of Liberty (PDLs). IKEN B. GULLEM
Source: Salug District Jail-BJMP R9