Gipakusog sa Bureau of Fire Protection (BFP) Salug ang kahibalo ug kahandam sa mga estudyante ug personnel sa pag-atubang sa sunog ug uban pang emerhensiya pinaagi sa Unified 911 Launching ug Fire Square Road Show nga gipahigayon niadtong Septiyembre 11,2026 didto sa Salug National High School, Barangay Poblacion East.
Gipangulohan ni SFO4 Roseller P. Taleon, ang kalihokan nga nagpasiugda sa kamahinungdanon sa paspas nga pagtawag sa 911 o emergency hotline alang sa dali nga pagresponde sa mga otoridad sa panahon sa krisis.
Gihimo usab ang maong programa isip pagpahinumdom sa Septiyembre 11, nga nagtimaan sa trahedya sa Estados Unidos diin 343 ka bombero ang namatay samtang nagtuman sa ilang katungdanan sa pagluwas sa mga tawo.
Kabahin sa aktuwal nga pagbansay ang Fire Square Road Show, diin gihatagan og hands-on nga kahigayonan ang mga partisipante sa pagkat-on sa nagkadaiyang teknik sa fire prevention ug emergency response.
Gitun-an sa mga magtutungha, magtutudlo ug school personnel ang hustong paggamit sa fire extinguisher, knot tying, electrical safety, pagsul-ob ug pagtangtang sa personal protective equipment (PPE), CPR alang sa bata ug hamtong, fire hose connection ug batakang firefighting techniques.
Pinaagi niini, tumong sa BFP nga maandam ang komunidad sa hustong lihok sa unang mga minuto sa emerhensiya, ilabina ang paspas nga pagpangayo og tabang ug pagpatuman sa mga batakang sukdanan sa kaluwasan.(MEDALYN U. BORJA)
Source: BFP RIX CRS Salug MFS