Gisugdan ang Community-Based Disaster Risk Reduction and Management o CBDRRM Capacity Building 2026 aron mapalig-on ang kahibalo ug kahandam sa mga barangay sa pagsukol sa mga katalagman ug emerhensiya. Gipahigayon ang unang adlaw sa Manuel’s Resort, Piñan, Zamboanga del Norte.
Mitambong ug mipakigbahin sa iyang mga panan-aw si Mario A. Baterna, Provincial Director sa Department of the Interior and Local Government-Zamboanga del Norte, nga mipasiugda sa kamahinungdanon sa pagpalig-on sa disaster preparedness ug resilience sa lebel sa barangay.
Gipunting sa unang adlaw ang pag-organisa sa Barangay Disaster Risk Reduction and Management Committee, lakip ang mga tahas, gimbuhaton ug legal nga basihan niini. Gihisgutan usab ang proseso sa CBDRRM ug ang kamahinungdanon sa partisipasyon sa komunidad sa pag-ila sa mga risgo, pagpakunhod sa kahuyang, ug pagpalig-on sa kahandam sa matag barangay.
Girepaso usab sa mga partisipante ang Barangay Profiling ug Community Risk Assessment aron mas masabtan ang mga peligro, kahuyang, kapasidad ug risgo sa ilang tagsa-tagsa ka komunidad. Pinaagi sa mga diskusyon, pagpaambit sa kasinatian ug aktibong partisipasyon, gipalig-on sa unang adlaw ang tumong nga magsugod sa komunidad ang epektibong pagpangandam ug pagdumala sa mga katalagman.(JENIFFER JR. DELICA)
Source: DILG Rizal