Mipahigayon og 25-adlaw nga Local Mission Trip sa Dipolog City ang Every Nation Campus, isip kabahin sa ilang mga kalihokan alang sa pagpalambo sa mga kabatan-onan ug mga estudyante.
Miabot sa siyudad ang mga miyembro sa maong organisasyon gikan sa Victory Church sa Santa Rosa, Laguna ug mipahigayon og courtesy visit kang City Mayor Roberto Y. Uy niadtong Agosto 19. Ang kalihukan gipatuman pinaagi sa koordinasyon sa Victory Church-Dipolog ug Every Nation Campus-Dipolog, lakip ang pagbisita sa nagkalain-laing tulunghaan ug pagpahigayon og mga kalihokan pinaagi sa ilang Student Hub.
Tumong sa grupo nga matabangan ang mga estudyante sa pagpalambo sa leadership, integrity, faith ug excellence o LIFE, pinaagi sa gagmayng panagtapok, pagtudlo ug mga kalihukan nga nag-awhag sa ilang aktibong pakiglambigit sa komunidad. Makigtambayayong usab sila sa mga ginikanan ug mga tulunghaan aron masuportahan ang mga estudyante sa ilang pag-eskwela ug pag-andam isip umaabot nga mga lider.
Giawhag usab sa Every Nation Campus ang mga estudyante nga mobisita sa ilang Student Hub nga nahimutang sa Old May Cinema sa Turno, Dipolog City, gikan Lunes hangtod Biyernes, alas 10:00 sa buntag hangtod alas 5:00 sa hapon, atol sa ilang 25-adlaw nga Local Mission Trip.(JENIFFER JR. DELICA)
Source: Dipolog City Government