Gipalig-on ang panagtambayayong tali sa kapulisan ug lokal nga panggamhanan aron mapauswag ang panginabuhian sa Barangay Mamawan, Baliguian, Zamboanga del Norte pinaagi sa usa ka miting nga gipahigayon niadtong Mayo 4, 2026.
Gipangunahan sa R-PSB Team sa ZN 2nd PMFC ubos ni PLT Paolo Miguel S. Mercado ug sa supervision ni PLTCOL Edwin D. Verzon ang maong panagtigum kauban si Barangay Chairman Gani A. Esmali Jr. aron hisgutan ang mga isyu ug panginahanglan sa komunidad.
Sa maong miting, girekomenda ang Mamawan Alsa Masa Farmers Association, nga akreditado sa Department of Labor and Employment, aron maapil sa Enhanced Gahasang Bahandianon sa Umahan program sa Provincial Government.
Dugang pa, gipadali usab ang hangyo nga maila ang mga miyembro niini isip agrarian reform beneficiaries uban sa suporta sa Municipal Agriculture Office, nga nagtumong sa pagpalig-on sa komunidad ug paghatag og malungtarong panginabuhian sa mga residente.(JENIFFER JR. DELICA)
Source: Zamboanga del Norte 2nd PMFC