Aron mahatagan sa maayong pagtagad ug pagserbisyo ang adunay problema sa pangisip, ang Zamboanga del Norte Medical Center (ZNMC) misugyot ngadto sa Private-Public Partnership (PPP) Center sa pagpatukod sa Psychiatric Ward sa nasangpit nga tambalanan.
Kini atol sa gipahigayong Public-Private Partnership (PPP) Center nga unang Online Capacity Building Activity (OCBA) sa PPP Project Identification, Prioritization, and Structuring via Zoom.
Si Ms. Lenie Castañeda, Administrative Officer IV sa ZNMC nga maoy mitambong sa maong 2 ka adlaw nga pagbansay-bansay nagkanayon nga usa ang atong lalawigan mipadayag sa nasangpit nga planong pag-imposar sa maong proyekto.
Sanglit ang Commission on Human Rights mi-konsiderar nga nanginahanglan sa psychiatric ward ang ZNMC subay sa akta republika 11036 kon Mental Health Act.
Ang maong pagmugna sa psychiatric ward kalambigit kini sa 2023-2027 Hospital Development Plan sa ZNMC sa liderato ni Governor Rosalina Jalosjos nga kalakip usab sa Local Investment Plan for Health (LIPH) pinaagi sa Provincial Health Office.
Base sa Mental Health Focal Person sa Provincial Health Office natala sa bulan sa Pebrero ning tuiga nga adunay 427 ka mga pasyente sa tibuok lalawigan nga nagkinahanglan nga mahatagan sa tukma nga pagtambal aron makaangkon kinig himsog ug maayong pangisip.
Matud pa nga ang mental health cases makita sa pipila ka mga kadalanan palibot ning probinsya nga adunay mga naglatagaw nga mga nawad-an sa maayong pangisip.
(Source: Provincial Information Center ZaNorte Facebook page)