Pormal nang gisugdan sa Provincial Statistical Office sa Zamboanga del Norte ang Third Level Training alang sa 2025 Updating of List of Agricultural Farm Operators and Inland Fishing Households ug 2025 Listing of Marine Fish Landing Centers (ULAFO-LMFLC) na gipahigayon didto sa Top Plaza Hotel, ning syudad sa Dipolog, niadtong Agosto 11, 2025, nga magpadayon hangtod sa Agosto 15, 2025.
Ang maong kalihokan kabahin sa usa ka nasyonal nga inisyatibo nga nagtinguha sa pagpalambo sa usa ka statistical sampling frame nga naglangkob sa giusab ug gi-update nga listahan sa mga agricultural farm operators, inland fishing households, ug marine fish landing centers.
Gipahigayon ang 2025 ULAFO-LMFLC ubos sa Republic Act No. 10625 o Philippine Statistical Act of 2013, nga naghatag sa Philippine Statistics Authority (PSA) og mandato sa pagpanguna sa mga nasyonal nga surbey ug estadistikal nga kalihokan.
Gipangayo sa PSA ang kooperasyon sa tanan, ilabi na sa mga respondent ug gipiling mga panimalay, aron masiguro ang husto ug kasaligang datos pang-agrikultura ug pangisda. Ang maong datos magamit sa pagplano ug pagpatuman sa mga epektibong polisiya ug programa nga naglangkob sa pagpalambo ug pag-uswag sa sektor sa agrikultura ug pangisda.(Jumalisa Papa)
Source: PSA ZAMPEN