Nagpagawas og public advisory ang Sindangan Central Fire Station human mabiktima sa prank o peke nga food orders nga gigamit ang ilang ngalan ug ubang ahensya sa gobyerno.
Sumala sa estasyon, niabot karong adlawa ang 36 ka kahon sa pizza gikan sa Mr. Snow Pizza ug mga pagkaon nga nagkantidad og ₱11,000 gikan sa Familia Restaurant nga wala nila gi-order o gi-aprubahan.
Gikondena sa BFP ang maong iresponsableng binuhatan nga nakahatag og kahasol ug pinansyal nga kadaot sa mga negosyo nga nagpaningkamot og patas nga panginabuhi.
Gipahibalo nga gi-report na ang insidente sa Sindangan Philippine National Police alang sa imbestigasyon ug pag-ila sa responsable, samtang gipahimangnoan ang publiko nga likayan ang ingon ani nga mga buhat kay kini mahimong magdala og legal nga sangputanan.(JENNIFER JR. DELICA)
Source: BFP Sindangan MFS