Gipahigayon sa Provincial Project Monitoring Council o PPMC sa Zamboanga del Norte ang 3rd Quarter Meeting niadtong September 8, 2026 sa Provincial Capitol sa Dipolog City, diin gitakda ang pagbisita ug pag-inspeksyon sa mga proyekto nga gi-implementar sa tulo ka distrito sa probinsya.
Gipangulohan ni Acting Administrator Charmie A. Uy isip Chairperson, gihisgutan sa konseho ang pag-inspeksyon sa mga proyekto aron masusi kung nagsubay ba kini sa mga detalye nga gilatid sa ilang Program of Works o POW. Giuyonan usab sa mga miyembro nga ipahigayon ang project visits sa tulo ka distrito sa bulan sa Oktubre.
Gipadayag usab atol sa miting ang pipila ka problema sa pag-implementar sa mga proyekto, lakip ang pagsaka sa presyo sa mga materyales nga nakaapekto sa mga POW ug hinungdan sa kakulang sa mga kontraktor nga modawat sa pipila ka proyekto. Gihisgutan usab ang mga proyekto nga gibiyaan sa mga naunang nagtrabaho apan gipadayon sa kasamtangang administrasyon ni Governor Darel Dexter T. Uy, ingon man ang pipila ka proyekto nga gipunduhan ubos sa Department of Education nga adunay kaugalingong specifications.
Namatikdan usab sa PPMC ang mga isyu sama sa kanipis sa semento sa pipila ka mga karsada nga dali maguba kon maagian sa dagkong mga sakyanan. Samtang, gipakita sa meeting ang pito ka proyekto nga 100 porsyentong nakompleto, diin gihimo ang resolusyon alang sa rekomendasyon ug pag-apruba ni Governor Darel Uy. Ang resolusyon giduso ni PPMC Vice Chairperson Engr. Dioscoro G. Endab ug giuyonan sa tanang miyembro.(JENIFFER JR. DELICA)
Source: Zamboanga del Norte Provincial News Network