Dako ang pagpasalamat ni Polanco Mayor Evan Hope D. Olvis sa kagamhanang probinsyal sa pagpangulo ni Governor Rosalina “Nanay Nene” Jalosjos sa gipahigayong Grand Caravan Outreach Program ug Awarding sa Nutri Gana Program nga gipahigayon sa Barangay Isis, Polanco, Zamboanga del Norte.
Matud pa ni Mayor Boyet Olvis nga subay sa ilang pagsaulog sa 71st Founding Anniversary sa Polanco naghan-ay kinig usa ka semana nga adunay nagkadaiyang kalihukan.
Gibutyag ni Mayor Olvis nga dako ang iyang pasalamat sa kagamhanang probinsyal pinaagi sa Ayuda Ni Nanay Nene tungod usab sa paghatag sa 500 ka putos nga tag lima ka kilong bugas ug sa mga seedlings ug organic fertilizers alang sa maong grand caravan.
Ang katawhan sa napulo ka mga barangay sa lungsod sa Polanco nga nasulod sa cluster 3 maoy nakapahimulos sa nasangpit nga caravan nga gilangkuban sa Barangay Sto. Niño, San Miguel, Isis, Villahermosa, San Antonio, Lingasad, Magangon, Guinles, Anastacio, Obay.
Sa maong grand caravan gipadangat usab sa LGU Polanco ang nagkalain-laing serbisyo sama sa appliance and cash prizes sa mga napiling mananaog gikan sa Nutrition Municipal Council, pagpahatag sa mga school supplies, feeding program, ug booklet alang sa mga senior citizens, COVID-19 vaccination and booster shots, operation tuli, pag-ibot sa ngipon, medical check-up ug libreng pagpanghatag sa bitamina, food assistance, canned goods ug libreng alot kon tupi alang sa mga bata ug tigulang.
Sumala pa sa Mayor nga tumong ug tinguha sa ilang usa ka semanang pagsaulog sa pagkahimugso sa Polanco, tumong ug tinguha niini nga magkahiusa ang katawhan sa pagpasalamat nga nakab-ot ang ika-71 ka tuig nga pinalanggang Lungsod sa Polanco.
Ngani, mao usab ang katapusan nga Community Outreach Program nga nagdala sa tema nga “serbisyong gipaduol sa mga katawhan”, sa katuyoan nga ang serbisyo sa namunoan maoy miduol sa katawhan.
(Source: Provincial Information Center Zanorte Facebook page)