Gipasiugdahan ni Provincial Director PCOL Jimmy M. Laguyo ang importansya sa Barangay Peace Action Teams (BPATs) sa pagmintinar sa kalinaw ug kahapsay atol sa ilang pagbansay nga gipahigayon sa Municipal Gymnasium sa Poblacion, Leon B. Postigo.
Sa iyang pamulong isip Guest of Honor and Speaker, gilatid ni Laguyo nga dako ang papel sa BPATs sa pagtabang sa kapulisan sa pagmonitor sa seguridad, paglikay sa krimen, ug pagpatuman sa kalinaw sa matag komunidad. Gipasabot usab niya ang panginahanglan sa mas lig-on nga koordinasyon ug kooperasyon tali sa lokal nga awtoridad, residente, ug mga community volunteers.
Matod niya, ang aktibong partisipasyon sa BPATs makahatag ug dugang kusog sa mga inisyatiba batok kriminalidad ug makatukod ug mas luwas nga palibot alang sa katawan.
Ang maong kalihokan nagpakita sa komitment sa Zamboanga del Norte Police Provincial Office (ZNPPO) sa pagpanday ug hapsay nga relasyon tali sa kapulisan ug katawhan, aron mas mapalig-on ang kalinaw ug kalig-on sa probinsya.(IKEN B. GULLEM)
Source: Zamboanga del Norte Police Provincial Office