Gihatagan ug mobile health services ang 315 ka mag-uuma sa lubi gikan sa upat ka barangay sa Mutia atol sa usa ka adlaw nga medical mission sa Philippine Coconut Authority–Region IX (PCA-IX) kaniadtong Disyembre 4, 2025.
Sa aktibidad sa Mutia gymnasium, libre nilang nakuha ang dental check-up, blood chem, ultrasound, X-ray, ECG, CBC ug urinalysis, lakip ang snacks ug paniudto.
Gipaambit sa PCA-IX, LGU-Mutia ug Provincial Government ang kalihukan aron madala ang healthcare ngadto sa mga coconut farmers nga lisod maka-access sa serbisyo.
Gipasalamatan ni Governor Darel Dexter Uy ang programa ug misulti nga kinahanglan padayon nga duolon ang mga mag-uuma sa serbisyo medikal sa tibuok probinsya. Gipadayag usab niya ang plano sa probinsya nga maglunsad ug mobile app para sa mas dali nga konsultasyon tali sa pasyente ug doktor.
Si Elpedio Espiritu Jr. sa PCA-Zamboanga del Norte mipahibalo nga adunay umaabot nga hospitalization assistance nga nagkantidad ug P40,000 matag mag-uuma paghuman mapirmahan ang MOA ug ma-accredit ang walo ka ospital.
Nagpakita ang kalihukan sa padayon nga suporta sa gobyerno alang sa kahimsog ug kaayohan sa mga mag-uuma sa lubi.(IKEN B. GULLEM)
Source: Zamboanga del Norte Provincial News Network