Pormal nga gipahigayon ang pinirmahay sa kasabutan tali sa kagamhanang lokal sa Dipolog ug mga benipisyaryo sa Dipolog City Scholarship Program kagahapon sa buntag, Disyembre 9 atol sa “Orientation and Signing of Scholarship Agreement.”
Si Mayor Darel Dexter T. Uy kinsa maoy nangulo sa kalihukan ang mipasabot sa mga resipiyente nga ang iyang administrasyon naningkamot nga matabangan ang mga magtutungha nga makapadayon sa ilang pagtuon sa kolehiyo pinaagi sa nasangpit nga programa.
Gidasig sa mayor ang 30 ka mga scholars uban sa 40 ka kwalipikadong resipiyente sa Educational Financial Assistance nga maningkamot ug magtuon aron magpabiling scholar tungod kay ang edukasyon importante kaayo alang sa maayong kaugma-on.
Si konsehal Marilou Y. Calibo, Chairman sa Committee on Education and Culture, kinsa maoy nangamahan sa Ordinance No. 22-324 o naila nga “Dipolog City Scholarship and Educational Financial Assistance Program for Low Income Families”, mipasabot kon unsa ang katuyo-an sa nahisgutan nga ordinansa. Samtang mihatag og dugang katin-awan si Atty. Raul Barbaso, City Scholarship Adviser, kon unsa ang nahisulat dinha sa kasabutan kon “Agreement” tali na sa siyudad ug mga scholars.
(Source: Dipolog City Government Facebook page)
