Gipahigayon sa Provincial Government of Zamboanga del Norte (PGZN) pinaagi sa Provincial Disaster Risk Reduction and Management Office (PDRRMO) ang lima ka adlaw nga Training for Instructors (TFI) sa Incident Command System (ICS) sugod Mayo 4 hangtod 8, 2026 sa Top Plaza Hotel, Dipolog City.
Ang maong pagbansay maoy unang TFI-ICS sa Zamboanga Peninsula sulod sa pito ka tuig ug una usab sa Zamboanga del Norte, ilawom sa liderato ni Governor Darel Dexter T. Uy nga naghatag og prayoridad sa pagpalig-on sa disaster preparedness ug response sa probinsya.
Sumala sa PDRRMO, lisod makasulod sa TFI-ICS kay kinahanglan moagi sa upat ka lebel sa kwalipikasyon—Basic ICS, Integrated Planning, Position Courses, ug All-Hazard Incident Management Team sa wala pa makasulod sa instructor level.
Adunay 12 ka modules ang pagbansay ug gipangulohan sa grupo sa expert trainers ug CADRE members gikan sa lain-laing ahensya sa disaster management, ubos sa supervision sa Office of Civil Defense (OCD) Davao Oriental.
Miapil sa training ang 25 ka participants gikan sa LDRRMOs sa Zamboanga del Norte, kauban ang mga representante sa DepEd, BFP, PNP, ug Philippine Red Cross, nga nagpakita sa multi-agency nga pamaagi sa disaster response.
Sumala sa OCD, ang pagbalik sa TFI-ICS human sa 2019 nagtumong sa pagpalig-on pag-usab sa grupo sa certified instructors nga makapasabwag sa kahibalo sa ICS ngadto sa mga komunidad.(IKEN B. GULLEM)
Source: Zamboanga del Norte Provincial News Network