Mipaabot sa iyang dakong pagpasalamat si Provincial Officer Agent Ariel Escudero sa Philippine Drug Enforcement Agency (PDEA) sa Zamboanga del Norte ngadto sa kagamhanang probinsyal pinaagi ni Governor Rosalina “Nanay Nene” Jalosjos sa hugtanong suporta niini alang na sa Anti-Illegal Drugs Campaign.
Kini ang gipamahayag ni Agent Escudero kalabot na sa Barangay Drug Clearing Program diin sa 691 ka barangay sa Zamboanga del Norte, aduna na lamang 59 ka barangay ang dili pa kini clear sa illegal nga druga.
Dugang ni Agent Escudero nga gikalipya niya ug nagpasalamat siya ni Governor Jalosjos sa iyang kaasgot pagsuporta sa maong programa.
Matud pa ni Agent Escudero nga doble ang ilang paningkamot karon aron madugangan pa ang drug-cleared barangays dinhi.
Gipamahayag usab ni Agent Escudero nga sa dili pa motapos karong tuiga, adunay lima ka barangay ang gikalatid sa deliberasyon aron mahilakip kini sa drug-cleared barangay.
Gipasalamatan usab ni Agent Escudero ang mga mayor sa matag lungsod nga hugtanong misuporta sa kampanya batok sa illegal nga druga.
Gihangyo lamang ni Agent Escudero nga magtinabangay ang tanan tungod kay dili lamang kini problema sa usa ka sektor kondili mahilambigit ang bisan unsang sektor sa katilingban.
Niini, nanghinaut ug giawhag ni Agent Escudero nga kinsa pa tong migamit sa illegal nga druga nga moundang na kini dili lamang alang sa ilang kaugalingon kondili lakip na usab sa iyang pamilya.
Si Agent Escudero usa sa mga resource speakers atul sa Trainer’s Training in the Implementation of the Family Drug Abuse Prevention Program (FDAPP) in the Province of Zamboanga del Norte, Agosto 15-16 niining tuiga nga gipasiugdahan sa kagamhanang probinsyal pinaagi sa Provincial Social Welfare and Development Office (PSWDO).
Kini nagbatbat kalabot na sa The Role of PDEA as the lead Agency in the Fight Against Drug Abuse and Trafficking and Awareness on the Different Dangerous Drugs. (Angelica T. Obina)
(Source: PIC-Sheng Jumalon Bala)