Gipaila sa mga residente sa Barangay Goaw, Liloy ang Panahon ng Pagkilos: Philippine Community Resilience Project (PCRP) atol sa unang Barangay Assembly niadtong Hulyo 13, isip kabahin sa pagpalig-on sa partisipasyon sa komunidad ug pagpangandam batok sa mga risgo ug kalamidad.
Atol sa asembliya, gipasabot sa mga partisipante ang kinatibuk-ang programa sa PCRP, lakip ang mga nag-unang konsepto niini, Community Resilience Implementation Process (CRIP), Local Conflict Context (LCC), ug Environmental and Social (E&S) Disclosure, aron masabtan ang mga lakang ug responsibilidad sa komunidad sa pagpatuman sa proyekto.
Kabahin usab sa kalihokan ang pagpili sa mga miyembro sa Barangay Resilience Team (BResT), nga mangulo sa pagplano ug pagpatuman sa mga inisyatibang makapalig-on sa kahandam sa barangay, ingon man sa Stakeholder Feedback Mechanism (SFM) Sub-Committee nga motabang sa pagsiguro sa transparency, accountability, ug aktibong partisipasyon sa komunidad sa tibuok implementasyon sa proyekto.
Pinaagi sa mga diskusyon, mas nasabtan sa mga partisipante ang kamahinungdanon sa resilience planning ug ang papel sa panagtinabangay sa pag-ila sa lokal nga mga risgo, pag-andam sa angayng mga lakang, ug pagpalambo sa inklusibo ug malungtarong kalamboan sa Barangay Goaw.
Padayon nga gipalihok sa KALAHI-CIDSS ang mga komunidad pinaagi sa Panahon ng Pagkilos: Philippine Community Resilience Project aron mapalig-on ang partisipatibong pangagamhanan ug matukod ang mas luwas, mas andam, ug mas lig-on nga mga barangay.(IKEN B. GULLEM)
Source: KALAHI-CIDSS Liloy