Mibisita sa Local Government Unit sa Gutalac ang Provincial Government sa Zamboanga del Norte nga gipangulohan ni Governor Darel Uy, pinaagi sa Provincial Engineering Office, aron magpahigayon og coordination meeting bahin sa hustong pagpatuman sa mga proyekto nga ginapundohan sa probinsya sa maong lungsod.
Gihisgutan sa maong tigum ang alignment sa mga proyekto, tin-aw nga timeline, ug hapsay nga koordinasyon tali sa probinsya ug lokal nga pangagamhanan aron masiguro nga ang matag proyekto direktang motubag sa prayoridad nga panginahanglan sa mga Gutalacnon.
Gipahayag ni Mayor Justin Quimbo nga tumong sa LGU Gutalac nga ang tanang proyekto ipatuman sa husto, episyente, ug naka-angay sa tinuod nga kahimtangan sa komunidad. Sa ngalan sa katawhan sa Gutalac, nagpasalamat usab ang mayor sa padayon nga suporta ni Governor Darel Uy nga nagpadayon sa paghatag og proyekto alang sa kalamboan ug kaayohan sa lungsod.(IKEN B. GULLEM)
Source: LGU Gutalac-Public Information