Maisogon nga gibutyag ni Sangguniang Bayan Member Marcelo “Tata” Yano nga adunay bolok sa politika ang wala pagrenew sa deed of usufruct sa kagamhanang lokal sa lungsod sa Sindangan sa lote nga gibarogan sa Sindangan District Hospital nga gidumala sa probinsya ilawom sa liderato ni Governor Rosalina “Nanay Nene” Jalosjos.
Matud sa konsehal nga atol sa ilang regular session basta lamang gi-alegar sa majority member sa SB ang ilang giingon nga 13 ka mga rason nga maoy ilang gibasihan nga nag-ingon nga inotil ang operation maong wala nila i-renew ang usufruct sa lote sa maong tambalanan.
Pagsaysay sa konsehal nga ang trese ka mga rason basta nalang gitugpo sa hawanan sa Sangguniang Bayan nga wala gani maski gipataban nga dokumento.
Dugang pa niya, nga sa iyang pagsuroy-suroy sa mga kabarangayan iyang nadungog ang pagbatikos sa mga maboot nga mga lungsoranon kabahin sa gibuhat sa iyang mga kauban sa Sangguniang Bayan ug sa liderato sa lungsod.
Ang kabanay sa usa ka pasyente nga na admit sa hospital sa Sindangan nga si Eustiquio Maglangit, taga Lower Inuman Sindangan, nagool sa gibuhat nga lakang sa kagamhanang lokal sa Sindangan aron sirad-an ang nasangpit nga tambalanan.
Para niya, siya gisakitan ug nakapangutana nga mag-unsa nalang sila kung wala na ang hospital sa ilang tugkaran ilabina nga pobre lamang sila.
Kung mahinayon ang pagpasira sa hospital sa Sindangan ang mga apektado mao ang lungsod sa Sindangan, Siayan, Jose Dalman ug Leon B. Postigo.
Samtang sa kabahin sa chief of hospital Dr. Caril Mejorada siya nagkanayon nga wala sila hatage ug higayon nga maka-isplikar sa SB aron unta pugngan ang pagpasirado sa nasangpit nga tambalanan.
Ang pagtawag ug “inotil” sa Sindangan district hospital dakong tamparos alang kanila nga mga doctor ug uban pang mga empleyado.
Tataw nga ang gibuhat sa Sangguniang Bayan walay due process ug basta nalang nihimo ug desisyon nga giingon nga ilawom sa mando sa dakong agta sa lungsod sa Sindangan.
Angay masayran, ang Sindangan District Hospital nakadawat ug mga award.
Kini mao ang award gikan sa PhilHealth nga Handog Pasasalamat with Stakeholders PLAQUE of RECOGNITION sa SINDANGAN DISTRICT HOSPITAL isip most improved facility in Region IX for the CY 2023 penirmahan ni PADLO JOHANN C. PEREZ, Plaque of Recognition sa Sindangan District Hospital in recognition of the hospital’s exemplary performance in the implementation of hospital-based programs as mandated by the Department of Health. As a model health facility, Sindangan District Hospital continues to maintain its dedication to excellence in the setting of hospital care. Given this 27th day of April 2024 at Garden Orchid Hotel, Zamboanga City gipermahan ni JOSHUA G. BRILL INTES, MD, MPH, CESO IV Director IV.
Kahibaloan nga sa panahon ni Kanhi Governor Rolando Yebes ang Sindangan District Hospital usa ka level 1 hospital apan sa pagbanos ni Kanhi Governor Roberto Uy gikan sa level 1 nikanaog ngadto sa infirmary level.
Sa pagka karon ilawom sa pagdumala ni Governor Nanay Nene Jalosjos sa probinsya diin usa sa iya 5 point agenda mao ang health hinay hinay na nga na-inat ngadto sa level 1 hospital ang district hospital sa Sindangan.
(Source: Banat Mindanao)