Malampusong napahigayon ang pagpang-apod-apod og mga Family Food Packs ngadto sa duha ka Barangay nga sakop sa dakbayan sa Dapitan, nga gipangunahan mismo sa ilang Mayor, pinaagi ni Mayor Evelyn T. Uy, diin ang unang dapit sa pagpanghatag niini didto filahigaton sa Ground Floor, sa Dapitan City Government Center ug mideretso dayon ang grupo ngadto sa Barangay Carang ug Barangay Sinonoc, sa matag Barangay Hall niini, niadtong nakalabay’ng adlaw, Setyembre 28, 2025.
Ang nasangpit nga Citywide Distribution of Food Packs matud pa, usa ka inisyatiba nga gipaningkamotan sa ilang Mayor ug sa ila usab nga 1st District Congressman, uban ang suporta nila City Councilor Bienvenido T. Dini-ay, City Councilor Dennis Tan, nga maoy kasamtangang Chairman sa Committee on Agriculture, maingon man ang DSWD, CSWDO, ug ang pagpakigtimbayayong usab sa City Agriculture Office nga gipangunahan ni City Agriculturist Cyril Patangan.
Gikalipay ug dako sa mga Dapitanon ug nagpasalamat ang mga rehistrado ug napamatud-an nga mga mananagat sa naasoy nga dakbayan ang nahisgutan nga programa, tungod kay ang maong hinabang matud pa, usa ka dakong tabang alang sa ilang pamilya human nga naapektuhan sila sa milabay nga bagyo.
Dugang pa niini nga ang maong kalihukan nagpakita sa lig-on nga panaghiusa ug kooperasyon tali sa Lokal nga kagamhanan ug sa mga Ahensya sa Gobyerno aron masiguro nga ang tanang Pamilya, labi na ang mga Mananagat nga Apektado sa Kalamidad, dili mahikawan sa tinuod nga serbisyo ug Tabang, maingon man nga nagpabilin ang prayoridad sa administrasyon sa ilang Mayor ngadto sa katawhan, ang paghatag og Malinawon, Hapsay, ug Tinud-anay nga Pag-atiman alang sa kaayohan sa tanang Dapitanon.(Julius Esmade)
Source: DAPITAN CITY GOVERNMENT