Gipasiugda sa Provincial Agriculture and Fishery Council o PAFC ang mga panginahanglan sa sektor sa agrikultura ug pangisdaan atol sa Provincial Development Council meeting niadtong Agosto 7, diin ilang gipresentar ang mga rekomendasyon alang sa mas maayong serbisyo, logistics ug pagdumala sa maong sektor sa probinsya.
Gipresentar nila PAFC Chairperson Ranulfo L. Arcos ug Technical Support to the Chair Ed Neilson G. Gallemit ang mga sugyot ngadto sa PDC nga gipangulohan ni Governor Darel Dexter T. Uy. Lakip niini ang province-wide implementation sa Joint Department of AgricultureāDepartment of the Interior and Local Government Memorandum Circular No. 1, Series of 2025, nga nagtumong sa pagpalig-on sa papel sa Agriculture and Fishery Councils sa lokal nga pagdumala.
Gisugyot usab sa PAFC ang paglaan og pondo sa 2027 Annual Investment Program alang sa operasyon sa municipal ug city Agriculture and Fishery Councils, lakip ang ilang mobility, administrative ug organizational requirements. Dugang pa, gisumite sa konseho ang sugyot nga gamiton ang PAIC-Irasan Monolithic Dome sa District II isip provincial storage ug distribution hub alang sa mga agricultural commodities ug farm inputs.
Matud sa PAFC, makatabang ang maong mga lakang sa pagpasayon sa pag-apod-apod sa mga liso, abono ug uban pang farm inputs, pagpalambo sa post-harvest handling ug storage, ug pagpalig-on sa produktibidad ug food security sa probinsya.(JENIFFER JR. DELICA)
Source: Zamboanga del Norte Provincial News Network