Naglunsad og libreng pagbansay sa organic farming ang Zamboanga del Norte 2nd Provincial Mobile Force Company (PMFC) R-PSB Team uban sa Technical Education and Skills Development Authority (TESDA) aron matabangan ang mga mag-uuma nga makaminus sa gasto ug mapalambo ang ilang ani.
Gipahigayon niadtong Abril 5, 2026 ang unang adlaw sa duha ka adlaw nga Organic Concoction Training ubos sa pagdumala ni PLTCOL Edwin D. Verzon ug sa pagpanguna ni PEMS Arnel P. Vilan. Ang kalihokan gipahimuslan sa mga miyembro sa Kahugpungan sa Makugihun na Mag-Uuma sa Kayok.
Gipunting sa maong training ang praktikal nga paghimo og organikong abono gamit ang mga materyales nga sayon ra makuha sa palibot sama sa tanom ug uban pang natural nga sangkap. Tumong niini nga mapakunhod ang pagsalig sa mahal nga komersyal nga abono ug mapalawom ang paggamit sa malungtarong pamaagi sa panguma.
Sumala sa mga tigpasiugda, dako ang matabang niini dili lamang sa pagpakunhod sa gasto sa produksyon, kundili usab sa paghatag og dugang kita sa mga mag-uuma pinaagi sa paghimo ug pagbaligya sa ilang kaugalingong organic inputs.
Gisuportahan ang kalihokan ni Barangay Chairman Neil A. Estimo ug TESDA Agricultural Technician Jun Alfonso T. Benlot, nga nagpakita sa panaghiusa sa lokal nga liderato ug mga ahensya sa gobyerno aron mapalig-on ang sektor sa agrikultura, ilabi na sa mga layo ug kulang sa serbisyo nga komunidad.(IKEN B. GULLEM)
Source: Zamboanga del Norte 2nd PMFC