“Gawas nga healthy ang organic farming, swak usab kaayo kini sa giya sa pagdumala sa mahal natong Gobernadora. Ilawum sa iyang framework of governance nga gi-encapsulate sa acronym nga HEATS, diin ang letter A stands for Agriculture.” Kini ang tipik sa mensahe ni Ms. Lenie Castaneda, Supervising Administrative Officer kinsa nag-representar ni Governor Rosalina “Nanay Nene” Jalosjos atul sa 3rd Provincial Organic Agriculture, Oktubre 18 ug gipahigayon sa Zamboanga del Norte Convention and Sports Center.
Dugang sa mensahe ni Ms. Castaneda nga gihingusgan ni Governor Nanay Nene nga molambo ang agrikultura lakip na ang organic agriculture. Ingon man, si Ms. Castaneda ang nagkanayon nga importante kaayo ang mga mag-uuma sa atong probinsya, ug kinasingkasing kining gipasalamatan ni Governor Nanay Nene gumikan sa ilang kakugi alang sa katawhan sa Zamboanga del Norte kinsa nakakaon sa masustansya ug organikong pagkaon. Nanghinaut si Governor Rosalina “Nanay Nene” Jalosjos nga magpadayon ang kakugi ug mapalambo pa ang organic agriculture sa Zamboanga del Norte.
Samtang sa mensahe ni Dapitan City Mayor Seth Frederick “Bullet” Jalosjos nga gipabati ni Mr. Peter Dominic “Britz” Hamoy, kini ang nagkanayon nga ang organikong pagpanguma ang labaw pa sa simpleng pamaagi sa pagpananum. Kini ang importanteng lakang aron himgpit nga preserbar ang kinaiyahan. Dugang ni Mayor Bullet nga ang pagsagup sa organic farming, dili lamang kini makatabang sa pag-amuma sa kayutaan, kon dili malikayan usab ang pag-gamit sa kemikal nga makadaut sa panglawas ug kalikupan.
Si Provincial Agriulturist Maybel Bustalino ang namahayag usab nga ang 3rd Provincial Organic Agriculture Congress gihimo aron mahibal-an ang mga pamaagi sa organikong pagpanguma. Ingon man ang pag-amuma sa kalikupan, panglawas ug espirituhanong kalag. Gipahibalo usab ni Ms. Bustalino ang probinsya sa Zamboanga del Norte nakadawat ug 44 ka composting facility for biodegradable waste gikan sa Department of Agriculture-Bureau of Soils and Water Management alang sa mga mag-uuma.
Ang 3rd Provincial Organic Agriculture Congress gitambungan kin isa 300 ka organic farmers sa probinsya sa Zamboanga del Norte ug gipasiugdahan sa kagamhanang probinsyal pinaagi na sa Office of the Provincial Agriculturist. (Angelica T. Obina)
(Source: PIC-Sheng Jumalon Bala)