Nibisita ang mga opisyal sa National Police Commission (NAPOLCOM) Regional Office IX, pinangulohan ni Regional Director Atty. Pablito M. Abad, Jr., ngadto kang Gobernador Darel Dexter T. Uy aron hisgutan ang mga preparasyon alang sa People’s Law Enforcement Board (PLEB) Seminar, nga gipahigayon sa Capitol Building, Dipolog City, kaniadtong Nobyembre 11, 2025.
Kauban sa delegasyon sila Atty. Sherry C. Recososa, Chairperson sa Police Regional Appellate Board 9, Atty. Edmund Rey B. Calo, Randell Joy B. Mercado, ug Roxille D. Maglangit sa PLEB Technical Support Unit.
Ang maong pagbisita kabahin sa mga kalihukan sa preparasyon alang sa seminar on the Roles of the Local Chief Executive as Deputized NAPOLCOM Disciplinary Authority ug sa Powers and Functions sa People’s Law Enforcement Board (PLEB) nga gipahigayon sa Zamboanga del Norte Convention and Exhibition Center niadtong Nobyembre 12, 2025.
Gipadayag ni Gob. Uy ang iyang tibuok-suporta sa inisyatibo sa NAPOLCOM ug gipasiugda ang importansya sa paglig-on sa kapasidad sa mga lokal nga opisyal ug sa PLEB aron mapadayon ang kalinaw, disiplina, ug kahapsay sa tibuok probinsya.(IKEN B. GULLEM)
Source: Zamboanga del Norte Provincial News Network