Napahimuslan sa onse (11) ka pasyente ang libreng operasyon ug 160 usab ang nakadawat ug libreng konsultasyon sa Zamboanga del Norte Medical Center (ZNMC) kaniadtong Nobyembre 12, 2025.
Ang kalihukan kabahin sa health program ni Governor Darel Dexter Uy, diin matag bulan adunay mga espesyalistang doktor gikan Cebu nga motabang sa libre nga opera ug konsulta. Lakip niini si Dr. Jonathan Navarro, kauban nila Dr. Michael Burdador, Dr. Paul Serios, ug Dr. Imeldo Gamallo.
Ang mga operasyon naglangkob sa thyroid, hernia, gallbladder, breast surgery, ug uban pang tumor procedures. Gidasig sa mga doktor ang publiko nga mopahimulos sa maong libreng serbisyo.
Si Pastor Aurelio Jastiva, Jr., 35 anyos taga Poblacion South, lungsod sa Polanco, kinsa operahanan sa hernia ang mipaabot sa iyang pagpasalamat ngadto ni Governor Darel Dexter Uy uban sa Ginoo nga lakip sa nakapahimulos sa maong serbisyo.
Ang ZNMC, ubos ni Dr. Esmeralda Nadela, nakab-ot usab ang 100% compliance sa PhilHealth No Balance Billing (NBB) Policy. Matud sa medical team head nga si Herdina Gallegos, dili lamang taga-probinsiya ang naberipisyohan sa serbisyo, kondili lakip usab ang pasyente gikan Oroquieta ug Zamboanga City.(IKEN B. GULLEM)
Source: Zamboanga del Norte Provincial News Network