Aron mapaangay ang kahibalo sa olingan youth kabahin sa digital nga panahon, ang Department of Information and Communications Technology (DICT) Zamboanga del Norte nagpahigayon ug pagbansay pinaagi sa Cybercrime ug Robotics Training alang sa mga kabatan-onan sa Barangay Olingan, didto sa Olingan Barangay Hall, Dipolog City.
Gihatagan ug tukmang kahibalo ang mga partisipante bahin sa tinuod nga epekto sa pag-apil sa cybercrimes, ug gipasiugda ang kahinungdanon sa pagpraktis ug maayong digital values aron malikayan ang seryosong legal nga silot ilawom sa Cybercrime Prevention Act of 2012.
Nakadawat usab ang kabatan-onan ug makapaengganyo nga introduksyon sa robotics, diin ilang nakita kung giunsa paggamit ang teknolohiya isip himan sa pagtukod, pag-imbento, ug pagsulbad sa problema. Gipresentar usab kanila ang nagkalain-laing oportunidad sa STEM (Science, Technology, Engineering, ug Math) nga mahimong dalan sa usa ka produktibo ug mauswagon nga karera.
Naglaum ang DICT ZDN nga pinaagi niini, mas daghan pang kabatan-onan ang mahimong responsableng digital users ug mamahimong andam sa padayong pag-uswag sa teknolohiya.(IKEN B. GULLEM)
Photo courtesy: DICT IX BASULTA