Gipahigayon sa National Irrigation Administration–Zamboanga del Norte Regional Sub-Office (NIA ZDNRSO), uban ang suporta sa Regional Office IX, ang Turn Out Service Area Group (TSAG) Meeting kauban ang mga opisyal ug miyembro sa Samigmu Irrigators Association, Inc. sa Mutia Communal Irrigation System, didto sa San Miguel, Mutia, Zamboanga del Norte.
Ang miting naghatag ug tin-aw nga plataporma alang sa mga mag-uuma sa pagpaabot sa ilang kabalaka bahin sa serbisyo sa irigasyon, ilabina sa mga isyu sa intake dam, nabara nga pipelines, ug dili maayong kondisyon sa access road padulong sa sistema.
Usa sa nag-unang isyu mao ang nabara nga pipelines ug panginahanglan sa backhoe support aron mabalik ang normal nga agos sa tubig. Gisiguro sa NIA ZDNRSO nga ibalik dayon ang backhoe sa Mutia CIS human makompleto ang operasyon sa laing sistema, ug iprayoridad ang elevation works ug pipeline clearing. Gidugang usab ang panginahanglan sa maayo nga access road alang sa ekipo ug mga mag-uuma, busa girekomenda nga maghimo og joint resolution ang IA ug Barangay Council aron maendorso ang proyekto sa NIA ug posible nga maapil sa DA-PRDP program.
Nagpasalamat ang NIA ZDNRSO sa hapsay nga koordinasyon sa mga mag-uuma ug nagpasalig sa padayon nga paningkamot aron masulbad dayon ang mga isyu ug mapalig-on ang kasaligan ug sustainable nga serbisyo sa irigasyon sa Mutia CIS.(IKEN B. GULLEM)
Source: NIA Zamboanga Peninsula