Nagpahigayon ang National Irrigation Administration – Zamboanga del Norte Regional Sub Office (NIA ZDNRSO) ug Refresher Course on Systems Management Training alang sa mga miyembro sa Sungkilaw Falls-Diwanon Irrigators Association, Inc. sa Sitio Pamansalan, Diwan, Dipolog City, niadtong Oktubre 20, 2025.
Tumong sa maong kalihokan nga mapaayo ang kahibalo ug kahanas sa mga mag-uuma sa pagdumala sa Pamansalan Communal Irrigation System, aron masiguro ang epektibo ug malungtarong paggamit sa tubig-patubig. Lakip na ang Cropping Calendar ug Pattern of Planting, nga nagpasabot sa pagtinabangay sa pagtanum aron patas ang pag-apod-apod sa tubig ug mas taas ang ani.
Gilakip usab ang mga hilisgutan sa Water Delivery and Distribution ug Repair and Maintenance, nga nagtudlo sa kahinungdanon sa husto nga pag-apod-apod, regular nga inspeksyon, ug panaghiusa sa pagpreserba sa mga pasilidad sa irigasyon.
Samtang, gihisgutan usab ang Conflict Resolution, diin gidasig ang mga miyembro sa pagpakig-ambitay ug maayong panag-uban aron dali nga masulbad ang mga isyu sa paggamit sa tubig ug operasyon sa sistema.
Pinaagi sa maong inisyatibo, gipadayag sa NIA ZDNRSO ang padayon nga suporta niini sa mga Irrigators Associations, aron mapalig-on ang ilang kapasidad ug mapaayo ang pagdumala sa irigasyon.(Iken B. Gullem)
Source: NIA Zamboanga Peninsula
