Ang mga opisyal sa National Irrigation Administration-Zamboanga del Norte (NIA-ZDN) mipahigayon og courtesy visit sa buhatan ni Mutia Municipal Mayor Hon. Lorrymir S. Adasa niadtong Hulyo 30, 2025, aron hisgutan ang kahimtang sa kasamtangang mga proyekto sa irigasyon ug mga gi-propose pa nga inisyatibo alang sa umaabot.
Gipasiugdahan sa miting ang paghatag og update sa mga nag-unang kalambuan sa mga proyekto, ang preparasyon alang sa mga kalihokan sa Kalendaryong Tuig 2026, ug ang papel sa lokal nga panggamhanan sa pagtabang sa proseso sa Right of Way (ROW), nga hinungdanon sa hapsay nga implementasyon sa mga imprastruktura.
Gibug-atonan usab ang panginahanglan sa padayon ug lig-on nga kolaborasyon tali sa NIA ug sa LGU sa Mutia aron masiguro ang malungtarong kalamboan sa sistema sa irigasyon. Kini nga paningkamot gikatakda nga makahatag og dakong tabang sa sektor sa agrikultura ug sa pangkalahatang kalambuan sa kabukiran sa lungsod.
Ang NIA-ZDN nagpabiling committed sa pagtukod og estratehikong pakigtambayayong uban sa mga lokal nga lider aron mapalapdan ang akses sa tubig pang-irigasyon usa ka hinungdanong suporta alang sa mga mag-uuma sa lalawigan.(Jumalisa Papa)
Source: NIA ZAMPEN