Tingkagol karon sa prisohan ang usa ka bag-ong nailhan nga Street Level Individual homan masikop atol sa gikasa nga buy-bust operation mga alas 9:48 ang takna sa kagabhion niadtong Oktubre 26,2025 didto sa Purok Pechay, Barangay New Tambo, Katipunan, Zamboanga del Norte.
Ang dinakpan nga drug suspek naila nga usa ka 18-anyos nga lalaki nga mananagat, nga bag-ong giila nga Street-Level Individual (SLI) druglist kinsa gidakop pinaagi sa mga personahe sa Katipunan Municipal Police Station.
Nasakmit atol sa operasyon ang usa (1) ka gamay nga heat-sealed transparent plastic sachet nga adunay sulod nga gidudahang shabu nga gigamit isip buy-bust item, upat (4) ka dugang nga gagmay nga sachet sa gituohang shabu nga nakuha sa possession sa suspek, usa (1) ka P500 bill nga gigamit isip marked money, ug usa (1) ka empty pack sa Berlin sigarilyo nga nagsilbing container.
Gibana-bana ang nasangpit nga drugas nga mutimbang sa duha ka gramo ang gibug-aton ug adunay gibana-bana nga street value nga P13,600.00.
Ang suspek gipahibalo sa hinungdan sa iyang pagdakop ug gipahibalo sa iyang mga katungod sa konstitusyon sa usa ka pinulongan nga hingpit niyang nasabtan.
Ang dinakpan gipailawom sa medical examination sa Katipunan Rural Health Unit ug anaa sa kustodiya sa Katipunan MPS samtang nagpaabot sa pagpasaka og kasong kriminal tungod sa paglapas sa Sections 5 ug 11, Article II sa Republic Act No. 9165, o nailhan nga Comprehensive Dangerous Drugs Act of 2002.(MEDALYN U. BORJA)
Source: ZNPPO