Wala na maka iskapo sa mga kamot sa tinugyanan sa balaod homan masikop atol sa gipahigayon nga drug buy-bust operation ang usa ka bag-ong nailhan nga Street Level Individual , mga alas 3:13 ang takna sa kahapunon niadtong Nobyembre 13, 2025 didto sa National Highway sa Barangay Galas, ning dakbayan sa Dipolog.
Ang maong dinakpan naila nga usa ka 22-anyos nga lalaki, walay trabaho ug residente sa Purok Kamunggay, Barangay Galas, dakbayan sa Dipolog kinsa gidakop sa mga personahe sa Dipolog City Police Station (SDET), uban sa mga operatiba sa Zamboanga del Norte 1st Provincial Mobile Force Company (1st PMFC) ug sa koordinasyon sa PDEA 9.
Nakuha gikan sa suspek ang usa ka gamay nga heat-sealed sachet sa gituohang shabu isip buy-bust item, usa ka gamay nga heat-sealed sachet ug usa ka dako nga heat-sealed sachet sa gituohang shabu nga nakuha gikan sa possession sa suspek, usa ka PHP 500 nga buy-bust money, usa ka yellow-and-black POCO touchscreen nga cellphone, ug usa ka baynte pesos nga sensilyo.
Ang nasakmit nga ebidensiya sa droga adunay gibana-bana nga kinatibuk-ang gibug-aton nga kapin o kulang 0.5 gramos nga adunay standard nga presyo sa tambal nga PHP 3,400.
Ang mga nakumpiska nga drug items ang gi-turn over sa ZDN Provincial Forensic Unit alang sa eksaminasyon, samtang ang nadakpan nga suspek pabiling anaa sa protective custody sa Dipolog CPS alang sa tukmang disposasyon.(MEDALYN U. BORJA)
Source: ZNPPO