Nagmalampuson ang pagdumala sa “Halad Pasalamat 2025,” nga gitigoman sa nagka lain-laing relihiyon, usa ka ecumenical nga pasalamatong paghiusa, nga gipahigayon sa D’Food Hub and Events Center sa Dipolog Boulevard kaiadtong Disyembre 5, 2025.
Gidumala ubos sa tema nga “Giving thanks is the sacrifice that honors Me, and will surely save those who obey Me” (Psalm 50:23), ug gitambongan nila City Mayor Roberto Y. Uy, Zamboanga del Norte Governor Darel Dexter T. Uy, uban pang opisyal sa dakbayan ug probinsya, mga lider sa lain-laing pundok sa pagtuo, ug daghang lumulupyo nga niapil sa kalihokan.
Tungod kay ecumenical kini, nag-uban ang mga lider Kristiyano, Muslim, ug Subano sa pagdumala sa mga pag-ampo nga nagtimaan sa panaghiusa ug panagpasalamat sa komunidad. Ang mga pag-ampo naglangkob sa gobyerno, kahusay ug kalinaw, negosyo ug ekonomiya, edukasyon, agrikultura, panglawas ug sosyal nga serbisyo, pamilya, ug kalikupan.
Ang “Halad Pasalamat 2025” nagpakita sa lig-on nga espiritu sa pagpasalamat, paghiusa, ug kalinaw, nga nagpadayag sa tinguha sa Dipolog nga magpadayon ang usa ka malungtarong ug magkahiusang komunidad.(IKEN B. GULLEM)
SOURCE: DIPOLOG CITY GOVERNMENT