Ang Sangguniang Panlungsod (SP) ning siyudad miaprobar na sa usa ka ordinansa ang Ordinance No. 25-363 o “ AN ORDINANCE ESTABLISHING THE DIPOLOG CITY PUBLIC LIBRARY, APPROPRIATING FUNDS THEREOF, AND FOR OTHER PURPOSES” sa gipahigayon nga regular session sa miaging adlaw nga Enero 14, 2025, didto sa SP Session Hall, ning dakbayan.
Kahibaloan nga ang nahisgutang nga balaodnon adunay tinguha sa pagpauswag sa kahibalo sa matag usa ug ingon man kapasidad sa mga katawhan, sa pamaagi nga musaka ang lebel sa literasiya ug pag-ila sa mahinungdanong aspeto sa pagpalambo sa lokal nga serbisyo, imprastraktura ug organisasyong pang-kultura pinaagi niining pag-establisar sa usa ka “City Public Library”, nga mahimong “accessible” alang sa tanang Dipolognon ug sa mga katawhan sa tibuok probinsya nga mobisita sa atong dakbayan.
Kahinumduman nga kining pagpatuman ug pagpasar sa maong resolusyon ang giduso pinaagi sa motion ni City Councilor Marilou Y. Calibo nga giaprobahan sa tanang miyembro sa konseho sa Sangguniang Panlungsod diin kusganun kining nahimong usa ka lokal nga balaod. Ang maong ordinansa nga “Dipolog City Public Library” ang gihimo isip usa ka division ilawom sa buhatan sa Mayor ning dakbayan.
Matud pa nga ang City Public Library ang giplanuhan nga ibutang didto sa 2nd floor sa Museo Dipolog, ang magbaton sa daghanang mga reading materials sama sa mga libro nga gi-prescribe sa mismo sa Department of Education, National ug Local News Papers, apil na usab nga mahimo kining lugar alang sa “Audio-Visual Presentation” ug uban pang mga gimbuhatan alang na sa katawhan sa Dipolog.
Sa dugang kahibalo ang Section 7 niining nahisgutang nga ordinansa, diin ang “City Public Library” ang paga-dumalon sa usa ka kwalipikadong City Librarian nga adunay Bachelor’s Degree in Library Science nga adunay lima katuig nga kasinatian sa Librarianship and a bona fide holder sa Certificate of Registration ug Professional Identification Card nga gi-isyu sa Professional Regulatory Board alang sa mga Librarians ug sa Professional Regulations Commission subay sa Philippine Librarianship Act of 2003.(ANGELICA T. OBINA)
Source:CIO DIPOLOG