Gihatagan ug dungog ang Lokal nga Pangagamhanan sa Sergio Osmeña Sr. atol sa 2025 National Science and Technology Week (NSTW) sa Laoag City, Ilocos Norte, tungod sa aktibo ug padayon nga pakigpartner sa Department of Science and Technology (DOST) ug University of the Philippines–Los Baños (UPLB) alang sa implementasyon sa SARAI Systems and Technologies.
Ang LGU Sergio Osmeña Sr., kauban ang Kabasalan ug Zamboanga City, maoy napili nga ilhon isip SARAI CeNTRO partners, usa ka pasidungog nga nagpakita sa ilang hugot nga suporta sa paggamit sa siyensya ug datos aron mapaayo ang agrikultura sa lokalidad.
Sumala sa DOST-IX, dako ang papel sa LGU Sergio Osmeña Sr. sa unang tuig sa pagpatuman sa Project SARAI CeNTRO sa rehiyon, ilabi na sa pagpalambo sa data-driven nga pagplano sa agrikultura, pagtabang sa mga mag-uuma, ug pagtukod og mas intelihenteng mga pamaagi sa pagdumala sa yuta ug panguma.
Gipadayag sa DOST IX ug sa SARAI Zamboanga Peninsula Team ang ilang pagpasalamat sa LGU Sergio Osmeña Sr. sa pagpaluyo sa adbokasiya sa science-based agriculture, samtang mas daghang LGUs ang nagpakita ug interes sa pag-adopt sa SARAI technologies aron mapalig-on ang kaandam ug produksyon sa sektor sa agrikultura sa rehiyon.(IKEN B. GULLEM)
Source: DOST Regional Office No. IX