Gipakita ni Mayor Roberto Uy ang dagkong kalampusan sa mga programa alang sa kabataan sa siyudad atol sa iyang State of the Children’s Address kaniadtong Nobyembre 25, 2025, sa Zamboanga del Norte Convention and Sports Center. Giingon niya nga “every Dipolognon child is valued, protected, and prepared for a brighter future.”
Pinakaunang gibantog sa mayor ang kalamboan sa child health services: kapin 15,000 ka bata ang nakadawat ug libre nga check-up, medisina, ug bakuna pinaagi sa barangay health centers ug City Health Office. Gisugdan usab ang Vitamin A supplementation, deworming, ug 120-day feeding program alang sa 3,040 ka day care children nga gisugdan ug ₱9.1 milyon. Tungod niini, nakadawat ang Dipolog ug CROWN Award ug giila nga No. 1 sa 16 ka national awardees.
Gipalapdan sab ang serbisyo sa mga bata nga adunay special needs, nga 71 ang nakadawat og therapy, samtang gitabangan ang mental health sa kabataan. Sa child protection, 30 ka kaso sa abuso ang gisang-at ug hapit 100 ka menor de edad ang nailuwas. Gisiguro usab ang kahamugaway sa kabataan pinaagi sa disaster preparedness trainings sa mga eskwelahan.
Sa edukasyon, lig-on ang Early Childhood Care and Development Program nga nakatabang sa hapit 2,000 ka kabataan. Samtang, misaka ang scholarship support, 80 ka Alay Lakad scholars ug 270 ka estudyante sa Dipolog City Scholarship Program. Sa sports, ₱16 milyon ang gipang-apod sa 248 ka medalya sa ZPRAA ug 114 ka atleta sa Palarong Pambansa.
Gitapos sa mayor ang report sa pagdasig sa youth involvement sa governance pinaagi sa Youth Empowerment Congress ug SK Dipolog Federation nga giila nga Highly Functional Federation sa 2025 LAYAG Awards, ug nag-awhag sa padayon nga panaghiusa aron mapalig-on ang kabatan-onan sa siyudad.(IKEN B. GULLEM)
Source: Zamboanga del Norte Provincial News Network