Ipahigayon dinhi sa dakbayan sa Dipolog karong umaabot Mayo 14 ngadto sa 17, 2025 ang Mindanao League “Muay Thai Tournament”, Nga ipasiugda sa Muay Thai Association of the Philippines (MAP) ubos sa pagdumala sa kasamtangang Presidente niini nga si Mr. Stephen Arapoc.
Ang maong aktibidad nahibal-an human sa usa ka meeting sa adlaw sa Mayo 5, 2025 diin hugtanon kining gipatawag ni City Youth Sports Development Council Chairman, Atty. Chandler O. Ruiz.
Kahibaloan nga kining maong dula nasayran nga walay bayad o libre ngadto sa tanang katawhan nga adunay katakos musalmot kinsa usab mahiligon niini, nga didto ipahigayon sa partikularmente sa dalan Herrera kilid sa City Hall sa nasampit nga mga petsa gikan sa matag alas 3:00 sa hapon ngadto na taman sa matapos.
Matud pa kang MAP President, Arapoc, nga isip national sports association ug miyembro usab sa International Federation of Muay Thai Associations (IFMA), nga ang tanan gihimo arob sa pagmugna sa kaugalingong programa dinha sa sports development, nga ang tinguha niini nga makatabang nga mapalambo ang talento sa mga umaabot nga atleta, isip kalingawan nga makatabang sa pagmugna og pundasyon alang sa kalamposan dinha sa mga kompetisyon.
Nasayran nga ang maong dula ang pagasalmotan kini sa dul-an 200 ka mga atleta gikan dinhi sa Mindanao.Ug dakung garbo kini nga dinhi sa dakbayan sa Dipolog ipahigayon.(Angelica T. Obina)
Source: Dipolog City Information Office
